غدا ان شاء الله سأذهب لمشاهدة وسماع سعاد ماسى فى بلازا مكتبة الاسكندرية ... اطربتنى عندما سمعت كثير من اغانيها واتمنى ان تطربنى عندما اشاهدها وهى تغنى ولعلها تمحو تأثير آخر حفل موسيقى حضرته مؤخرا وكان لفريق فرنسى يسمى بــ
او طبول البرونكس .. اصبت بالصمم بعده لعدة ايام بعد ان قام اعضاء الفرقة - حوالى تسعة عشر عضوا - بالخبط والرزع على براميل فارغة وبمصاحبة طبلتين الكترونيتين - كانما 19 برميلا فارغا غير كافيين لاحداث ضجيج كافى !!
وبعد حوالى الساعة والنصف من الخبط والرزع حطموا فيها العشرات من "عصيان المقشات" التى كانوا يستخدمونها فى ضرب البراميل وحطموا ايضا اعصابى وتقريبا خشبة المسرح المصقولة اللامعة ... اما الذى شجعنى للذهاب لتلك الحفلة هو ماقرأته فى مدونة الدكتور خالد عن ذهابه لحفلة موسيقية استمع واستمتع فيها بموسيقى التايكو اليابانية او الكودو وهى التى يتم فيها العزف على طبول ضخمة وهو فن يابانى عريق وبالغ القدم .. اغرانى هذا بأن استمع الى فن الهيبى "الغيرعريق" والمأخوذ عن رعاع حى برونكس الامريكى والذين اعتادوا النقر على البراميل على سبيل التسلية ثم تحور ذلك لطريقة للتعبير عن الغضب والاعتراض على النظم الاجتماعية الجديدة والاثار السلبية للرأسمالية.
اغرانى هذا كله لحضور الحفل لاجراء المقارنة واهو كله طبل وايقاعات وكله عند العرب صابون .. وليتنى ما ذهبت.
على اية حال اتمنى ان تعوضنى حفلة سعاد ماسى غدا عن هذا "الزار الافرنجى" الذى حضرته سابقا واتمنى ايضا ان استمتع بها بحيث انسى تلك المخالفة المرورية التى ارتكبتها والغرامة التى دفعتها من اجل ان احجز تذكرة الحفلة
14 Comments:
هى كانت فيها مخالفة كمان..؟؟
عموما انت امير وتستاهل كل خير
بس انا فعلا اتمنالك قضاء وقت ممتع فى سماع سعاد ماسى
يمكن لما تتبسط ومودك يتظبط
ترجع تواظب على الكتابة...ومتهجرش البلوج تانى
وساعتها تبقى سعاد ماسى تستاهل يتعملها 100 مخالفة
بس صحيح هى حتغنى عربى ولا فرنسى
عشان اوجوردوى تو ني با اون فورم ...يمكن بكرة لما تسمعها تبقى اون فورم...كده ولا ايه..؟؟؟
متنساش تطمنا على الحفلة وعلى مود سعادتك يا باشا....قصدى يا مون بيه
اوروفوار
حلوة "اون فورم" دى؟
مش شتومة يعنى؟
اصل انا معلوماتى عن الفرنسية لا تتعدى جملة " حناطة ايه ان درول دو جرسون"
كتبت تعليق قبل كده على الموضوع ده
يعني يا خاين يا عميل رايح لسعاد ماسي
اخص عليك اخص
بجد ابقى سجل الحفلة وارفعها في نهاوند ومتبقاش وحش
وعلى العموم يا بختك يا عم انا بحب سعاد ماسي جدا
لكن حكاية مقاطعة حفلتها دي فكرتني بالحالة بتاعة البلد وانا بصراحة محبش افكر فيها
انا عرفت بالموضوع من هيثم جار القمر
و الانكت ان الناس مش فاهمة هو كان كاتب ايه
وداهية سودة يا ي لو كنت فاكرني باتكلم جد في اول التعليق
خالص التحيات
اوعى متنزلش التعليق ده
i can't wait aslan for her to come to cairo, my only problem is that i can't find anybody to come with me, apparently she is not that popular among my friends el so2al hoa is it worth going alone wala eih? el mohem you go and tell us how good it is.
وانا استجرى يا دكتور منزلش تعليقك !!
انا لسه جاى من الحفلة وكانت ممتعة الصراحة وهى غنت فيها تقريبا كل اغانيها اللى اعرفها واللى معرفهاش .. ولو كنت قرأت تعليقك قبل ماروح كنت عملت حسابى على التسجيل وخدت معايا العدة لكن للاسف ملحقتش
هو عموما انا محبش اسجل الحفلات المفتوحة اللى فى الهواء الطلق لأن النتيجة بتبقى مش ولابد وكمان للاسف ميعاد الحفلة جاء بعد ما اغلب طلبة الجامعة خلصوا امتحاناتهم وبالتالى جاء الكثير منهم ظانين انها حفلة لهيفاء وهبى يستطيعون الرقص والتصفيق على الفاضية والمليانة لكن لا انكر ان نسبة كبيرة منهم جاءت على اسم سعاد ماسى وواضح انهم استمعوا لاغانيها من قبل فانتظر كل منهم اغنيته المفضلة فى احترام .. فرنسيين كثيرون ايضا حضروا الحفل وجاء نأبهم على شونة لان سعاد لم تغنى بالفرنسية الا لفترة قصيرة.
قرأت تدوينة جار القمر قبل ان يضطر المسكين لتعديلها ويضع تنويه يبين فيه ان تدوينته من باب السخرية وتلقيح الكلام ولا تعبر عن رأيه الحقيقى
وبالنسبة لى فأنا لا اربط بين كل حدث وارتباط صاحبه بحفلة فى اسرائيل او الدنمارك او حتى لاقدر الله كرواتيا
:o)
فأنا لا احب الخلط او الاعتراض لمجرد الاعتراض .. الناس العبيطة الهبلة دى اللى مش قادرة على الحمار اللى فى بيتهم وراكبهم وجايين يتشطروا على البردعة !!
انا مش معترض على غناء سعاد ماسى فى تل ابيب ولكنى معترض على غنائها فى القاهرة
ايوه معترض .. كفاية تغنى فى اسكندرية .. ايه لازمتها القاهرة ؟؟ ما القاهريين مولعينها وعندهم بدل الحفلة عشرين وبدل المكان تلاتين !! واحنا يدوبك فى اسكندرية اغلب من الغلب .. هو يدوبك المكتبة والجزويت ومركز الابداع وشوية حتت متنطورة قليلة النشاطات
انا باحقد على القاهريين المفتريين اللى محتكرين كل حاجة
يسقط الاحتكار
يسقط الاستعمار
ويسقط المطر فى الشتاء
ومنورنا يا دكتور :o)
ملحوظة : لو قدرت احضر حفلة عمر خيرت كمان اسبوعين هاحاول اسجل منها حاجة
badr
Yesss.. it was good .. very good actually and I enjoyed it alot
بالنسبة لسؤالك الاولانى فهو ايوه طبعا "وورث جوينج اللون" ونص
مش مهم ان صحابك مش عاوزيين يروحوا حفلة سعاد ماسى انت هتلاقى هناك امم واكيد اكيد هتلاقى اصحاب تايين كنت ناسيهم وراحوا هم كمان يسمعوها
اذا كان هنا فى اسكندرية وعدد الحضور كان تقريبا فى حدود ثلاثة آلاف أمال فى القاهرة هيكون كام ؟؟
روح ويمكن تعمل صحاب جداد ذوقهم قريب من ذوقك .. بس روح بدرى علشان تلحق مكان قدام وعلشان كمان تشوف وتسمع الواد الليد جيتاريست لانه مفترى الصراحة
تحياتى
ياراجل وأنت برضك حاتجيب فن عمره كذا قرن لشويه عيال بيخبطوا على حلل بعصيان مقشه..شفت فى مونتريال من كذا صيف فى مهرجان الجاز السنوى مجموعه من نيويورك عاملين الدوشه دى..أداء ف الشارع وبراميل وجرادل وهات ياخبط..الحاجه الوحيده اللى عجبتنى أته كان ببلاش..بس أنا سعيد أنك أستمخيت من سعاد ماسى ﻷنها فعلا فنانه جيده والهيصه اللى أتعملت دى دليل على حاله الفلس العامه والغضب المشروع من ناحيه وغير الموجه من ناحيه تانيه..وبجد ربنا يستر.تحياتى..خالد
د.خالد
ماهى حفلات مكتبة اسكندرية برضه شبه مجانية يعنى التذكرة بسعر رمزى جدا. لكن ياريتهم عملوا الحفلة دى فى الشارع او البلازا بدل ما فرقه الشيخ عطوط الفرنسية لتطليع العفاريت دى كانت تكسر المسرح وتبوظه بعد حفلتها اللى كانوا بيرموا فيها شوية براميل فى الهواء بعد كل فقرة .. انا استغربت جدا لما لقيتهم سمحولهم بعمل حفلتهم فى مكان مغلق !!
منورنا يا دكتور خالد
أسعد الله أيامك بصوت سعاد ماسي وكل الأصوات التي تنسج من المويقى شالا من الصوف نرتديه لحمايتنا من صقيع الأصوات الزائفة
عزيزى ايماتور
سعيد أنك أستمتعت بسماع ورؤية سعاد الماسى
أما عن طبول البرونكس فممن الممكن أن تشاهد الفيديو الخاص بهم حيث الأخراج والديكورات الخاصة بالعرض وكذلك الرقصات الملازمة تضيف للعرض مذاق مختلف وإذا لم يعجبك الفيديو فالتحكم فى توصيل الكهرباءللأجهزة ليست مشكلة على الأطلاق,أما حضور العرض الحيى والألتزام بالجلوس لفترة العرض الكامل بدون الحركة وتحت رحمة مكبرات صوتية فى صالة مغلقة يعتبر طبعاً معاناة حقيقية.
تحياتى لك وأتمنى لك الكثير من الحفلات التى على شاكلة سعاد ماسى.
علاء
د.ياسر .. اسعدتنى قراءة تعقيبك الجميل
شكرا لمرورك سيدى
علاء السادس عشر .. عودا حميدا
بخصوص اقتراحك بالتحكم فى توصيل الكهرباء للاجهزة .. فهذا الامر كان صعبا للغاية فى الصالةالمغلقة وغير متاح.
اما عن حفلة سعاد ماسى فقد كانت جلستى بجانب الميكسر تماما وجميع كابلاته وتجهيزاته كانت تحت يدى وحتى لوحة التحكم فى برنامج الاضاءة كانت فى متناول يدى ولكنى لم اضطر للتعامل مع ايا منهم فقد كنت منسجما تماما ولم ارى اى داعى لاجراء تجاربى الكهربية فى هذا الحفل بالذات
حمدلله على السلامة
جميلة الحفلات الموسيقية دى بس اما تطربنا بجد وياريت تقول لنا اخبار الحفلة كانت ايه .. مجربتش تنزل القاهرة وتحضر حفلات الاوبرا ؟؟ اكيد حتستمتع كتير .. تحياتى
bocycat
الحفلة كانت جميلة بالفعل واطربتنى كثيرا واستمتعت بعدها باسبوعين مرة اخرى بحفلة عمر خيرت القصيرة
لقد اعدت مكتبة الاسكندرية موسم صيفى حافل هذه السنة
اما موضوع دار الاوبرا فى القاهرة فهو شبه مستحيل بالنسبة لى لاكثر من سبب .. الاول هو ظروف عملى وثانيا اننى لا اطيق جو القاهرة الخانق فقد اعتدت على جو الاسكندرية وصرت لا احتمل البعد عنها
شكرا لمرورك bocycat
Post a Comment