نداء الواجب لعبة فيديوجيم تفاعلية مشهورة .. فى الاصدار الثانى منها للعام 2005 كانت هناك لقطات ساذجة تمثل بعض المعارك فى منطقة الضبعة اثناء الحرب العالمية الثانية .. وفى الاصدار الرابع من نفس اللعبة والذى سيصدر هذا الشهر تقريبا هناك لقطات غير ساذجة (حرقت دمى) تستطيع ان تراها بوضوح لو ضغطت على الصورة الثانية لتكبيرها ورؤيتها بوضوح
- فى الصورة الثالثة نبذة عن تاريخ شركة اكتيفيجن - منتجة اللعبة- واسماء مؤسسيها ليفى وديفيد ووايتهيد .. الصورة من موقع ويكيبديا
- فى الصورة الرابعة .. تجد تعليق من "وسام" يبدى فيه اعجابه بمصممى اللعبة الذين راعوا الدقة فى اسماء الشوارع - طريق الاتوسوتراد وشارع الجيش وميدان العباسية- .. كما انه واضح ان الصورة ليست من خيال مصمم الجرافيكس بل منقولة من صور فوتوغرافية للمنطقة نفسها
واخيرا .. كل سنة وانتم طيبين ورمضان كريم
- فى الصورة الثالثة نبذة عن تاريخ شركة اكتيفيجن - منتجة اللعبة- واسماء مؤسسيها ليفى وديفيد ووايتهيد .. الصورة من موقع ويكيبديا
- فى الصورة الرابعة .. تجد تعليق من "وسام" يبدى فيه اعجابه بمصممى اللعبة الذين راعوا الدقة فى اسماء الشوارع - طريق الاتوسوتراد وشارع الجيش وميدان العباسية- .. كما انه واضح ان الصورة ليست من خيال مصمم الجرافيكس بل منقولة من صور فوتوغرافية للمنطقة نفسها
واخيرا .. كل سنة وانتم طيبين ورمضان كريم
9 Comments:
مساء الخير
يعني دي أول مره أدخل مدونتك وهو ما أعتبر نفسي محظوظا أنى فعلته، أنا كنت لسه باقرأ تدوينتك عن صديقك الأمريكي المسلم، وده ألى خلاني أعلق هنا لأنه وضح من تلك المدونه السابقه أنك شخص مثقف راجح الذهن ومتفتح
أنت معترض في ايه على الجيم؟
Call of Duty
كانت من أحب الألعاب ألي ومن أكثر ما أعتمد عليه لتصفية ذهني بعد فترة من أجهاد العمل
لعبه رائعه ومتقنه جدا
أيه الأعتراض على معارك في شوارع القاهره؟
هي عن الحرب العالميه التانيه وجرت معاك مهمه منها في مصر، طبعا ليس بالمدن، لكن في النهايه اللعبه خياليه
معترض على أن اصحاب الشركه يهود؟
بجد غالبا هم أسرائيليين، وكثير من شركات الجيمز الشهيرة أسرائيليه وهي صناعه مزدهره هناك جدا ..للأسف طبعا
وجهة نظرك أيه؟
بيدربوا العيال على فكرة غزو القاهره مثلا؟
ولا المشكله ألتقاط صور لمناطق من القاهره؟
مع تحياتي وأعزازي
Alexandrian far away
مساء النور
واهلا بك فى مدونتى المتواضعة
حضرتك بتسألنى انا معترض على ايه فى الجيم .. وانا مليش اعتراض على الجيم فى حد ذاتها بل انا معجب بها من الناحية التقنية كما اننى قضيت بعض الوقت فى تجربة الاصدار الثانى منها رغم بدائيته مقارنة بالاصدار الرابع - الاصدار الثالث لم يكن متاح على اجهزة الحاسب الشخصى وانما على اجهزة الاكس بوكس والبلاى ستيشن تقريبا-
انا اعتراضى الوحيد هو انى شفت صورة "حرقت دمى" .. هتقولى طب وحرقت دمك ليه؟ اقولك ان الصور والمواقع الحربية الموجودة فى الاصدار الثانى كانت كلها تاريخية حدثت بالفعل ولا احد ينكرها .. لكن لما ييجى فى الوقت الحالى ويتجاهل الحرب الدائرة فى العراق مثلا لما لها من آثار سلبية تحاول الادارة الاميركية تجنب الخوض فيها - ولو حتى عن طريق لعبة اطفال - وبعدين تيجى الشركة تدور على بديل تانى فى الشرق الاوسط فتقفز للمستقبل وتتخيل الحرب فى شوارع القاهرة !! مع ان الموضة فى الالعاب التى تتناول حروب المستقبل هى ان يكون العدو من الفضاء الخارجى مثلا ! وليس فى دولة لم تدخل فى حرب رسمية مع الولايات المتحدة زى مصر يبقى طبيعى ان دمى يتحرق .. مش كده ولا ايه؟
كلنا عارفين ان الحرب هتقوم هتقوم ان عاجلا او آجلا .. لكن مين يقدر يشوف صورة تخيلية لبيته مولع وطيارة هليوكبتر سواء امريكية او اسرائيلية او حتى موزمبيقية بتطير فوق سطح البيت وجنود اجانب بيطاردوه هو واهله وجيرانه بُغية قتله ودمه ميتحرقش ؟
لما الواحد يشوف صورة تخيلية تكسر حالة الانكار اللى احنا عايشينها برغم ما نراه فى نشرات الاخبار والفناه واعتدناه واعتبرنا ان هذا يحدث للآخرين فقط ولا يحدث لنا يبقى طبيعى ان دمه يتعكر
وييجى عم "وسام" اللى عايش فى ميّـه البطيخ يزود الطين بلّه ويبدى اعجابه بأن شارعهم طلع فى اللعبة!!
بس ياسيدى هو ده اللى خلانى اعمل البوست .. لأن ببساطة اتضايقت لما شفت الصورة
واخيرا اشكرك على مجاملتك فى اول تعليقك وياريت نشوفك كتير
تحياتى
انا اعتقد ان اللى اسمه وسام ده
لو كان بيته ظاهر فى اللعبة
كان حيضربه اول حاجة عشان يعرف بيتهم لما يولع حينور احمر ولا اصفر
معرفش ليه فكرنى بالممثل اللى كان فى فيلم ليلة سقوط بغداد ..واللى كان بيقول الامريكان حينضفونا لحد ما جم فعلا وقتلوه اول واحد وكان سعيد قوى ساعتها بالنضافة
متحرقش دمك...
رمضان كريم
Jana
الله اكرم ياستى
انا منكرش اننا كمصريين محتاجين عقلنا ينضف كتير .. بس لازم احنا اللى ننضفه بنفسنا ومينفعش حد ينضفهولنا .. محبش ابقى انسان من نوعية جعلوه فأنجعل
انا اللى كان غايظنى اكتر ساعتها لما شفت الصورة انى اكتشفت انى لسه ممكن اُستفز بعد ما افتكرت انى خفيت خلاص وكبرت على الحاجات دى .. بس الظاهر العلاج مش جايب نتيجة !!
سيبك انتى من الكلام ده .. إزّى اولادك الصغيرين ؟ وايه اخبار القطة اللى ولدت فى الجنينة وسابتلك عيالها وطفشت؟
الاختبار الحقيقى اللى تعرف بيه انت خفيت ولا لسه
انك تروح تقابل تامر حسنى وجها لوجه
فاذا لم تنتابك النوبة اياها ..يبقى نقدر ساعتها نقولك حمد لله على السلامة
بخصوص اولادى ...فبيسلموا عليك
ابنى الكبير عمل الهوموورك فى الكراسة
واخته عملته فى الكتاب
والصؤننة عملت الهوموورك بتاعها برضه ...بس فى مكان اخر
اما بخصوص القطاقيط.. فالحمد لله بعد الاختبار التالت ليهم ..او لما تبقى منهم.. اتأكدنا انهم كده يقدروا يعتمدوا على نفسهم ...فسربناهم
بعد ما اتأكدنا ان خلاص مافيش حاجة حتقف فى زورهم تانى وانهم بقوا قادرين على اكل كل انواع البيتزا
وبعدين انا اصلا مش ناقصة هوموورك كمان فى الجنينة...كده ولا ايه...؟؟
مع كامل احترامى لمشمش باشا
بص يا يسري
بصراحة معدتش اتأثر يمكن بقيت جبلة ولا عنديش دم مش عارف
بس بجد هي جت على دي ولا على السيد وسام
يا عم محدش واخد منها حاجة سيب الجدع يهيص
بس بجد جرب تقابل تامر سواء حسني او عبد المنعم
ولو قدرت تبقى خفيت
دكتورنا الكبير
مجيتش فرصة اقابل تامر حسنى او تامر عبد المنعم .. بس قابلت تامر تانى اسمه تامر عثمان من حوالى اربع تيام .. كان زميلى فى شغلى القديم وبعدين ساب الشغل و اشتغل فى شركة اوربيت .. قابلته صدفة وقعدت ارغى معاه نص ساعة .. الامانة هو شخص كويس بالرغم من اسمه .. وبعدين سلمت عليه ومشيت ..بس مش عارف اذا كنت خفيت ولا لسه !!
لا كده لسه مخفتش ما دام سلمت عليه ومشيت و محتاج كده تقابل ضروري تامر عبد المنعم
وياريت تقدر تعبر له عن رأيك فيه ومدى اعجابك بتمثيله بالبشرية
حالتك صعبة جدا يا يسري ومحتاجة علاج حاسم
عزيزى :u3m
اولا ابدى اعجابى بمدونتك الجميلة والتى وجدت فيها نوعا جديدا من الفن الراقى وخصوصا مجموعة الموسيقى التى فى محطة الراديو الرائعة - كما اؤيدك فى الرأى بخصوص صورة اللعبه فهى قد تكون سيناريو محتمل لمستقبل قادم قد يعجل به من يقف ضد مصلحة وطننا الغالى ومصرنا الغالية نصرها الله دائما وجعلها مقبرة للغزاه-واحب ان الفت نظر بعض الناس المغيبين عن الحقيقة ان مصر هى امنا وهى بيتنا ووطننا وكل شئ لنا ومستقبل اولادنا الذى نراه مزدهرا وجميلا ونرى فيه مصر عالية عظيمة دائما -- ولن يكون هذا الا بتعاون الشعب والجيش والشرطة يدا بيد والوعى التام بالاحداث الجارية ونبذ الفرقة والاختلاف الذى يفتح للمستعمرين ابواب التدخل الذى لم ولن ينالوه ابدا بإذن الله لأن مصر دائما عظيمة بشعبها الواعى المدرك لكل ابعاد الموقف ولن يسمح بأن تمس سيادة مصر ابدا ولن يسمح لفئة او مجموعة او قلة لا تعبر عن اغلبية الشعب ان تكدر صفو حياة الحرية الجديدة بعد ثورة 25 المجيدة
Post a Comment