اثناء بحثى فى الانترنيت على موسيقى البداية للمسلسل الاجنبى " منزل صغير فى البرارى" والذى اعتدت مشاهدته فى الثمانينيات كى اضع موسيقاه فى راديو المدونة وقعت بالمصادفة على عبارة غريبة فى جوجل شدت انتباهى .. كانت وصلة لموقع يتحدث عن مسلسل سيتكوم كندى اسمه "مسجد صغير فى البرارى" او Little Mosque on the Prarire سوف يتم عرضه فى اوائل شهر يناير للعام 2007 - قمت بهذا البحث فى منتصف ديسمبر من العام المنصرم- لذلك وضعت هذه الصفحة فى قائمة الفيفوريتس ونسيتها تماما حتى تعثرت فيها اليوم .. فبحثت عن حلقات هذا المسلسل ووجدت انه قد تم اذاعة حلقتين منه تقريبا وانه يتحدث عن معاناة المسلمين من اصول مختلفة فى التعايش مع مجتمعاتهم الجديدة (او القديمة حيث ان بعضهم ولد وتعلم هناك) .. خاصة بعد احداث سبتمبر ،، ويتناول المسلسل القصير تلك الاحداث بشكل كوميدى "متواضع" فى رأيى ولكن قد تختلف الرؤية اذا ما شاهدنا المسلسل بعين من عاشوا حياتهم فى الغرب ... وقد نال بعض الشهرة خارج حدود كندا فخطر لى ان اعرض عليكم الحلقة الاولى منه (ومدتها 22 دقيقة) وليكون الحكم منكم .. هل يستحق هذا المسلسل اى تعليق ام لا ؟
.
.
.
.
.
24 Comments:
صديقي إيماتيور..
ياعم إنت سايكك والا ايه؟
انا كنت لسه قاري مقال عن المسلسل ده.
مؤلفته من أصل باكستاني مسلمة علي سنة الله ورسوله.
بس أنا بصراحة لا أحب "تطبيع"
Normalization
وجود المسلمين بالشكل التليفزيوني ده. وكأنهم جماعة من غابات الامازون بس سبحان الله بني أدميين زيينا ..وبعدين كوكتيل فواكه ألوان .. وكأن المسلمين بقايا إحدي قبائل الهنود الحمر.
كان فيه مسلسل معفن أمريكي اسمه
Cell
والبطل امريكي مسلم يعمل في اف.بي.آي. ويحاول اختراق خلية ارهابية من بتوع جورج بوش .. برضه المسلمين اللي فيه يا إما سواقين تاكسي أو بيشتغلوا علي عربيات كشري ..
Thr mainstream media is infested with stereotyping and profiling
أما عن الاهداء فأنا شاكر جدا - مش شاكر فضله بتاع سمير غانم .. أيوووه ده قديم قوي .. فاكر المسلسل ده ـ
أنا برضه كنت بأعتبر فيلم عنتر من اعمال الفن الرفيع مركز نيازي مصطفي ، وكنت أجري علشان الحق أشوفه يوم الاحد في اليوم المفتوح .. أيام إبتدائي. بس اعظم فيلم كان أمير الانتقام طبعا، ولحد دلوقتي أنا الفيلم ده له معزة خاصة عندي لدرجة اني عايز اشتري الفيلم الخام.
المهم ,.. المزيكا تحفة واختياراتك نوستالجية ضاربة في اعماق اوائل الثمانينات.
تحياتي
شاهدت المسلسل ,ليس سىء ولكنه من رأيى يحاول أن يقول أنت كويس وأنا كويس وكلنا كويسين والموضوع سوء تفاهم . المشكلة وعدم القبول المتبادل بالنسبة لى أكبر وأعمق مما يقدم ولكن يحسب للمسلسل أنه يحاول طرح المشكلة .
شكراً على الأغانى وعلى المسلسلات ومش عارفين نرد الجمايل دى أزاى
تحياتى ومحبتى
دكتور وليد
انا مش سايكك - ولا سايكو كما اتمنى- هو المسلسل اللى جديد بس وطبيعى ان يكون فى كلام عليه فى اكتر من مكان ...
اما كلامك عن التطبيع والتعميم "والبرفلة" فهو بالظبط ما خطر لى عند مشاهدة المسلسل .. ولكن لو تكلمت به انا فاسأظهر وكأنى بابيع المياه فى حارة السقايين (لانى مسافرتش بره خالص) او كأنى بافتى بما ليس لى به علم .
ولذلك .. اشكرك على تعليقك .
اما بخصوص الاهداء فلا داعى للشكر وانا طبعا فاكر شاكر فضله جوز فكرية البكرية ودى حاجات تتنسى برضه ..
فيلم امير الانتقام برضه له معزة عندى - بس النسخة بطولة انور وجدى وليست الاخرى بطولة فريد شوقى .. بأسم "امير الدهاء"
وكتير بافتكر لقطة حسين رياض لما كان بيسأل الحارس ويقول له " انت رايح للحاكم؟" فيجيب الحارس بأنه "ايوه" .. فيعطيه حسين رياض على قفاه قائلا .. طب وصلّه دى
الفيلم كان لذيذ لانه كان بالعامية وليست الفصحى .. واعتقد ان انور وجدى كان احسن كونت دى مونت كريستو فى التلات اربع افلام التى اتعملت عن القصة دى
العزيز علاء السادس عشر
اتفق معك تماما فيما ذكرته عن المسلسل وان كنت اكثر فضولا لمعرفة الاوضاع فى المانيا ..لانه حسب ما اعتقد فالشعب الالمانى اكثر ثقافة من نظيره الامريكى او الكندى ويستطيع ان يفرق بين العربى والهندى والباكستانى والايرانى ولايضعهم كلهم فى بوتقة واحدة تحت اسم "الشرقيين داكنى البشرة"
وهل ياترى لسه فيه نازيين جدد عندكم ؟؟ بقالى فترة مقريتش عنهم حاجة
اما بخصوص الاغانى والمسلسلات فلا شكر على واجب .. هو غالبا انا هانقل الاغانى اللى فى الراديو على سيرفر جديد لان اصحابه اشتكوا من الباندويدث .. فتوقع يوم او اثنين من الاعطال لحين اتمام عملية العزال
شاكر فضله كان فى على مظهريعنى محمد صبحى مش سمير غانم
اما بلنسبة للمزيكة فلا يحضرنى الا كلمة مرى منيب
اه هاها
فكرتنى بلزى مضى
عزيزى ايماتور
النازيون الجدد كثيرون ومعظمهم يعيشون فى ألمانيا الشرقية سابقاً بينما أنا أعيش فى الغربيةوعموماً هناك صعوبة فى التعامل بين الألمان الشرقيين والالمان الغربيين نفسهم.للأسف فأن العرب والأجانب عموماً يحملوا الكثير من المسئولية عن النظرة السلبية التى يملكها الألمان عنهم .عموماً الألمان شعب محترم إلى حد كبير.
تحياتى
دكتور مهندس إيماتيور..
طالما ياسيدي إنت جبت سيرة الفيلم الغالي أمير الانتقام نسخة أنور وجدي طبعا .. فأحب أقولك إن حسين رياض كان اسمه الشيخ جلال عبدالله والحارس كان اسمه بكر وقام بالدور عبدالبديع العربي وكتب سيناريو الفيلم بيرم التونسي ومهندس المناظر كان ولي الدين سامح.. أظن دي أعراض حالة وسواس قهري كلاسيكية.
سؤال الحلقة النهارده: كان فيه 2 حراس .. بكر واحد منهم .. التاني كان اسمه إيه؟
........
أما عن موضوع البرفلة فده موضوع منتشر انتشار النار في الهشيم والغشيم .. والمسئول عنه الاعلام الرسمي وكذلك الجاليات نفسها.
في أمريكا حوالي 7 مليون يهودي لكن الشعب الامريكي يعرف يعني إيه ميتزفاه وهانكاه و روش هاشانا .. وبرضه فيه حوالي 10 مليون مسلم تيجي تسأل ابن العم سام عن رمضان يتنح ويديي وش الغباء ويقولك مصر دي جنب الهند وتقع جنوب شرق جمهوريات الموز .. ورمضان ده هوا الطريق الموصل لكازبلانكا علي يمين همفري بوجارت وأنت جاي.
يعني الموضوع تك لم تك لم ع الآخر ..
Topsy turvy
تحياتي
hesham
طب مادام ذاكرتك حديدية بأه ومعدتش عليك حتة سمير غانم زى ما عدت عليا ... قوللى حضرتك ايه هو اسم الحارس التانى "اللى كان مع بكر" فى فيلم امير الانتقام؟؟
لو عرفت تجيبه تقدر تعتبر ديون شهر يوليو اللى فات سقطت من قائمة المطالبات ويمكن اديلك نسخة ويندوز فييستا هدية
علاء السادس عشر
هو لسه فيه المان عندكم؟ انا فاكر انهم جم كلهم عندنا هنا فى شرم الشيخ والغردقة ليقتسموها مع الطلاينة
على فكرة .. هشام صاحب البوست اللى قبلك علطول يشبههم بشدة برأسه الحليق وملامحه العدائية وجاكيتته الجلد بس هو متعصب للجنس الكارتونى " من توون تاون يعنى" وليس للجنس الآرى.
شكرا علاء على المعلومات
دكتور وليد
الحقيقة انا مش فاكر اسم الحارس التانى خالص كل اللى فاكره ان الحارس الاول بكر كانت حواجبه تقيلة اوى :o)
عموما ان بعت اسأل سراج منير ذات نفسه اكيد هو فاكر اسماء الحراس بتوعه واول مايرد عليا هاجاوبك علطول
اما بخصوص موضوع اليهود السبعة مليون فطبعا لا يجوز مقارنتهم بسبعين مليون مسلم فى امريكا .. للعديد من الاسباب التى تعرفها انت اكثر منى .. بس برضه مش كل الامريكان يعرفوا رمضان بالرغم من ان بوش بيقولها كتير فى معظم خطاباته بس مين بيسمعله ؟ جرب كده تقولهم كلمة فلافل
اظن ان اسم الحارس الثانى خليل بس انا فاكر كا ن الحرس ثلاثة او اكتر
إيماتيور .. أستاذ هشام
بما إن الموضوع دخل في طيات الذاكرة الحافظة لموسم 1977/1978
يعني حفريات طفولية .. فالاجابة تكون لازمة ملزمة هنا.
جملة.. شاكر فضله بتاع مسلسل ميزو معناها الممثل اللي قام بدور شاكر فضله في مسلسل علي بيه مظهر بس كان أول ظهوره في مسلسل حكاية ميزو بطولة سمير غانم.
يعني اللي أنا عملته هو إدماج ذاكرتي والعتب ع النظر يا أصدقاء .. ده تداعي حر زي ما بيقول الحاج فرويد.
ميزو بتاع يانفيسة وطنط عنايات .. والفندام .. بس مش قادر أفتكر شاكر فضله أسمه الحقيقي ايه .. أفيدونا.
الحارس كان أسمه بيومي .. وفعلا كانوا تلاتة .. بكر وخليل وبيومي .. وبيرم كتب الحوار مش السيناريو ـ غلطة مطبعية .. فيه حاجة ـ
طب علي الكسار كان اسمه ايه في الفيلم؟
زي ماقولتلك يا إيماتيور حالة وسواس قهري
تحياتي
علي الكسار كان اسمه ايه في الفيلم
اظن اناسمه كان اسم معدن مرجان دهب او على نفس الوزن ريحان
معلش يادوكتورسؤال لائيم
مين كان فى الفيلم الأولانى والتانى غير فريد شوقى
الممثل بتاع ميزو كان اسمه فى المسلسل سلطان
هشام باشا.. بخصوص سلطان فى حكاية ميزو او شاكر فضله فى فرصة العمر احنا عاوزين اسمه الحقيقى .. ولو قدرت تفتكر له مسلسل ثالث تاخد 75 قرش
اما بخصوص على الكسار يا دكتور وليد فالصراحة انا كل اللى فاكره انه كان خادم لحسن الهلالى فى آخر الفيلم لما كان بيدعى انه من الاعيان معرفش بأه كان اسمه بركة ولا بكرة ولا مرجان .. ذاكرتى لاتصل لهذا العمق باى حال من الاحوال .. يمكن ابعت ايميل لتوجو مزراحى اسأله.
واخيرا بخصوص سؤالك يا استاذ هشام عن الشخصية المشتركة فى فيلمى امير الانتقام والدهاء فهى كانت شخصية الحصان تقريبا
شاكر فضله اسمه الحقيقى أعتقد سامى فهمى وعلى ما أتذكر أنه جاب فيزا أمريكا وأداها السكة بعد المسلسل ده.
ايوه صح .. هو كان فيه اسم سامى .. شكرا يا استاذ علاء
هشام باشا .. طاروا منك الخمسة وسبعين قرش
إيماتيور .. هشام .. علاء
الكونت دي مونت دي ميزو..
هشام: علي الكسار كان أسمه في الفيلم "الخادم نور" .. بس بصراحة إنت مذاكر الفيلم كويس، الفيلم مافيهوش بركة ولا حركة .. بطل غش.
أما عن سؤالك .. فالكريم لا يسأل إلا سؤال كريم مثله. والله أنا تخصصي أمير الانتقام مش الدهاء بس أعتقد أن حسين رياض قام بدور الشيخ جلال في الفيلمين .. ومين غيره يعرف يعمل الدور ده..
"يابني أنا سافرت كتير وشفت كتير وطلعت بحكمة واحدة: الانسان مسير .. لا مخير"/ الله يرحمه.
.........
علاء..
صح .. كان اسمه سامي فهمي، مثل شوية وبعدين فك علي أمريكا، ده أنت طلعت أروبة.
هو كان غتيت وبيفرق شعره م النص وشبه الشيخ العبيط ، والله عمل طيب أن كت ..
.........
إيماتيور..
توجو مزراحي لن يفيدك بشىء .. الفيلم من أخراج بركات انتاج سنة 50 .. يعني توجو كان ساب مصر وسافر فرنسا.. وبعدين إنت تعرف ايميل توجو منين؟
والله أنا كنت هسأل مين يعرف اسم الممثلة اللي قامت بدور طنط عنايات في ميزو بس قت كفاية أسئلة .. عموما هي كانت نعيمة وصفي ودي كانت ممثلة وكاتبة وزجالة ومترجمة .. تخيل
وعلي فكرة اللي كتب حكاية ميزو وفرصة العمر كاتب واحد .. هو لينين الرملي.
وكل رمضان وانتم طيبين
كان اسمو نور
للامانة العلمية فقط واقرارا للحق
هشام بعت الحل بتاعه قبل ما انشر رد الدكتور وليد
هذا للعلم واتخاذ اللازم
أيه ياعم اﻷسئله الصعبه دى..؟؟ كلها من خارج المقرر..!! حاجه كده زى تالته صيدله فارماكولوجى على أيامنا..!!شاكر على المرور الكريم والتعليق..والله الموضوع كله كان تهريج ونكته يس يظهر أنى نكأت الجرح كما قال جار القمر..مسلسل
Little Mosque...
بيعرض هنا فى كندا كلها أسبوعيا من المحيط الأطلسى للمجيط الهادى..وهم كلهم ٨ حلقات اللى أتعملوا للتجربه وبعدين نشوف..وبأختصار كده بيقول للكنديين "الطبيعيين" أن المسلمين دول شويه
eccentrics
فخدوهم على قد عقلهم..
وهكذا تدهورنا من رجال أشداء مقاتلين رومانسيين كما صورنا فالنتينو فى فيلم الشيخ الصامت ...
الى مشايخ بترول هبل صوره هوليود عن العرب بعد صدمه البترول اﻷولى...
الى أرهابيين -زى
Cell, The Stat , Intelegance...
-الى مجموعه من البلهاء.
.حلقه اﻷسبوع ده عن المايوه الشرعى اﻷسلامى وطبعا أخر مسخره..اﻷسوء أن أستراليا وافقت أن حراس الشواطئ المسلمين من اﻷناث يلبسوا مايوه نسخه من اللى طلع فى الحلقه وطبعا مالوش علاقه ب
Pamela Anderson
ولا ..
Bay Watch
وبصراحه مش عارف أزعل من الكنديين والا مننا أحنا..تحياتى..خالد
د.خالد .. آسف تأخرت فى الرد كعادتى
على فكرة الكويز ده فكرة د.وليد مش انا .. اما بخصوص البوست الكندى فحدوتة الرجل النيتف امريكان كانت جميلة جدا الصراحة.. ونفسى الناس هنا تبقى بالروح دى بدل مايتسلوا بدهس القطط بالعربيات .. طبعا فى كل مكان وزمان فيه الوحش وفيه الكويس .. بس يظهر انى الكيرف بتاعى كان تحت وانا بأقرأ البوست علشان كده حبيت اتلذذ شوية بانى اتصعّب على حالى.
اما بأه بخصوص المسلسل الكندى .. فأنا شفت شكل المايوه والست الزنجية لابساه .. لان الصورة دى فى الموقع الرسمى للمسلسل على النت ..
انا برضه تأثرت بعد ماشفت المسلسل بالظبط زى لما "بورات" تأثر لما عرف انه مش هيقدر يتجوز باميلا اندرسون وانها مش بكر رشيد !!
شكرا لمرورك وتعقيبك د.خالد
الممثل بتاع مسلسل ميزو اسمه سامى فهمى ومثل كمان فى مسلسل اسمه برج الحظ اللى فيه محمد عوض كان عامل شخصية شرارة ومثل فى مسرحية الدخول بالملابس الرسمية .الممثل دة كان بجد فنان هايل ياريت لو حد يعرف عنه اى معلومات وبيعمل اية الوقت ولية اختفى ؟
Anonymous
زى ماقلت حضرتك هو اسمه سامى فهمى ويبقى اخو الممثلة ليلى فهمى وكما قال الاخوة الافاضل فى ردودهم هو سافر لامريكا بعد الكام عمل دول ولم يظهر ثانية وبذلك انقطعت اخباره
تحياتى
Post a Comment